Asanble nasyonal Kenya vote maten jedi 16 novanm nan an favè deplwaman 1000 Polisye Kenyan pou vin konbat gang yo nan Peyi Dayiti.Nap raple mwa pase a se te tou pa kabinè ministeryèl kanya ki te ale nan menm sans la.
Sou kont x (Ansyen tweeter) pòt pawòl SDP a André Michel salye vòt palman kenya a.”Mwen bat bravo lakontantman pou desizyon palman nan peyi Kenya pran Jodi a kotel dakò pou polisye peyi Kenya vin ede PNH la kraze gang ak mete sekirite nan peyi a, depi 13 mwa SDP ap di nou pap ka soti anba gang yo san yon fòs entènasyonal. Mèsi nasyon zini pou fòs la.” nou tap site pot vwa SDP a.
Pi lwen Mèt Michel fè konnen moun Matisan, Fontamara, Tòsèl, Kwadèboukè elatriye ap tann fòs la pou yo ka retounen lakay yo, pwofesè lekòl, dyaspora tout ap tann fòs la.
Nap presize dosye deplwaman fòs la toujou devan lajistis peyi sa ki poko bay vèdik li. Fòk nou di tou gouvènman kenyan atravè minis enteryè yo Kithure Kindiki te reklame anviwon 200 milyon ewo ki se kòb misyon an ka koute a avan menm yo deplase kite peyi Kenya.
