Jodi dimanch 21 janvye 2024 la, Pap François ki se reprezantan legliz Katolik nan mond lan plede pou liberasyon 6 relijye bandi ak zam kidnape nan kapital Pòtoprens la vandredi 19 janvye pase a. Pap la tou pwofite mande pou vyolans la sispann nan peyi Dayiti.
Byen bonè nan maten vandredi 19 janvye pase a, yon gwoup nèg ak zam kidnape yon gwoup relijye kongregasyon ST Anne ki te nan yon ti bis ki ta prale nan inivèsite kongregasyon an. Daprè enfòmasyon redaksyon an rive jwenn, kidnapping sa rive fèt nan Avni Christophe la nan kapital Pòtoprens.
Pap François di li aprann nouvèl la ak anpil tristès epi li lamante sou sò Ayiti ap konnen nan moman sa yo. “Mwen aprann ak anpil tristès nouvèl anlèvman gwoup relijye ak lòt moun ki te avèk yo nan Pòtoprens. Pandan m ap mande ak tout kè m liberasyon yo, m ap priye pou lapè ak tèt ansanm tounen nan peyi sa a.” Deklarasyon Pap la ki pwofite mande moun ki konsène yo mete lapè nan peyi sa pou popilasyon ayisyen ka rale yon souf anba tray l ap pase yo.
N ap raple se uit (8) moun ki te nan ti bis sa a bandi kidnape vandredi a. Te genyen sis (6) relijye, yon (1) anseyan ak chofè machin nan. Enfòmasyon medya lokal fè kwè malfra yo ta pran wout riyèl Alèt ak moun yo. Ravisè yo mande 3 milyon dola pou liberasyon yo.
Carl Henry Florant
