Si w bliye non l, ou ka rele l Daka. li diplome nan Jesyon ak Administrasyon nan Modern School an Ayiti, li te antre an Repiblik Dominikèn sa gen anviwon 2 lane. Jèn ayisyèn 32 lane sa a , renmen kreye aktivite. Se sa k fè, nan anviwon 2 lane li genyen kay vwazen an, li gentan mete sou pye 2 konpayi. Tou de, espesyalize yo nan domèn makiyaj, penyen. Pou byen di, 2 antrepriz sa a yo se yon salon bote ak yon lekòl.
Si n ta kwè deklarasyon Pascale Daphcar Dorléans, li pa pè echèk ak difikilte. Jiskake, avan menm li kite Ayiti, li te deja monte yon salon bote ki ap fonksyone an Ayiti jiska prezan. Li sonje istwa salon bote sa a , tankou se te yè. Li di se ak selman 50 mil goud li te monte biznis la. Pou kounye a, jèn ayisyèn nan gen 2 salon bote ak yon lekòl; « Dakacia Beauty Salon and more et Daka School ».
Anplis de sa, pou rive ede konpatriyòt li yo an Repiblik Dominikèn Daphcar mete sou pye yon seri de fòmasyon sou makiyaj, très, dreadlocks, enstalasyon lace ak ”Onglerie”. Fòmasyon sa yo fèt chak mwa, nan lokal li nan San Isidro Santo Domingo Este. Youn nan prensipal objektif seri fòmasyon sa a yo, se rive entwodui fanm Ayisyèn yo, sitou nan aktivite ki gen bon revni. Atravè inisyativ li yo, natif natal Pòtoprens lan anboche ak anseye konpatriyòt li yo. Jodia, Daka School gen 54 etidyan. Kidonk, Daka se tankou yon koutmen pou ayisyen k ap chèche byennèt sou lòtbòzile a.
Malgre tout bagay, Daphcar gen gwo anbisyon pou peyi l. Li di li reve yon Ayiti ki estab. Sa pral pèmèt li tabli plizyè lekòl atravè divès pwovens. Epitou, li konte mete disponib yon seri pwodui kosmetik daprè estanda yo nan lide pou ede jèn yo vin pi alèz nan po yo.
