Nou menm, manm Pati Sitwayen Kretyen Ayisyen, nou gen anpil sousi pou sitiyasyon peyi ap viv jounen jodi a. Ensekirite, enstabilite politik ak enfliyans lòt peyi nan zafè pèsonèl nou kòm pèp afebli lapè ak estabilite n ap chache lontan.
Nan yon santiman patriyotik ki annamoni ak prensip fondamantal Konstitisyon ayisyèn 1987 la, n ap atire atansyon w ke pa gen okenn kote nan lwa peyi a ki pèmèt nou mete kanpe yon ekzekitif ki gen 2 tèt e k ap dirije pa yon Konsèy Prezidansyèl ki gen 7 manm ak 2 obsèvatè. Nan sans sa, Pati Sitwayen Kretyen Ayisyen mande nou pou nou montre nou sansib e konprann doulè pèp ayisyen an.
Poutèt sa, nan non enterè nasyon an, PCCH ap mande ak tout manm konsèy prezidansyèl 7 tèt CARICOM nan renonse ak pwojė sila, pou fasilite pèp la jwenn yon antant nan mitan tout aktè ayisyen e k ap kapab pi pwòch konstitisyon 29 mas 1987 la. PCCH ap voye jete byen Iwen konpòtman kominote entènasyonal la, sitou CARICOM, k ap chache fose pèp ayisyen an aksepte volonte yo pandan yo pa vle aksepte n kòm yon nasyon ki granmoun tèt nou.
PCCH, ap mande ak tout moun ki fè pati de konsèy prezidansyèl 7 tèt CARICOM nan pou yo mete tout ògèy yo sou kote, pou nou kenbe diyite nou kòm moun e pou nou deside ansanm sou chwa yon jij nan Lakou Kasasyon kòm prezidan tranzisyon an. Li lè pou nou pran desizyon vanyan e ki kapab ini nou pou byen peyi Dayiti.
PCCH, ap pwofite di ak tout moun sa yo si yo pèsiste nan chimen fè nwa sa e konpòte yo tankou moun ki pa sousye pou mizè popilasyon ayisyèn nan y ap responsab tout dega ki ta ka rive andedan peyi a.
Nou espere n ap pran konsyans, peyi a ak pèp ayisyen an paka tann ankò, PCCH ap pwofite raple nou ke moun ki nonmen nou yo se yo k ap kapab revoke nou.
TOUT MOUN DWE VIV !!!
Potoprens, 1 avril 2024.
Me. Jean Wilbert JEAN
Coordonnateur national
@jeanwilbertjean, jeanjeanwilbert@yahoo.fr
Contact + (509) 3119-6958
