Chèf gang Carlo Petit-Homme alyas Ti Makak mouri, Polis Nasyonal Dayiti konfime nouvèl la lendi 24 avril la nan yon konferans pou laprès.
“Apre dènye entèvansyon an e daprè sous enfòmasyon nou yo, chèf gang Ti Makak mouri akoz li te blese grav,” Se sa pòt pawòl PNH la Gary Desrosiers te fè konnen nan konferans pou laprès nan mitan jounen lendi sa a.
Yon lòt bò, Komisè Desrosiers te tou pwofite drese bilan sou operasyon ki te fèt nan Laboule 12, nan fyèf gang Ti Makak pandan mwa avril la. Plizyè prezime bandi te mouri, trant (30) machin ak sèt motosiklèt te imobilize, sis fizi atak ak plizyè lòt materyèl te sezi.
Nap raple, te gen dwèt lonje sou Gang Ti Makak la nan plizyè ka asasina ak kidnapin ki te fèt nan tèt Petyonvil sitou nan Laboule 12 ak vwazinaj li, kont polisye, jounalis ak sivil.
