Ayiti konnen yon madi 13 septanm lòk.Plizyè ri nan Pòtoprens lan ak zon ki antourel yo bare ak barikad epi kawotchou kap boule.
Nan ri Capois, nan vwazinaj palè nasyonal la, tankou anba Lali, nan Pòs Manchan, sou Boudon, Zòn Kanapevè, Petyon Vil, Peleren, Kafou Mawoka nan Kenskòf, wout yo pratikman bloke. Nan kèk kote, se sèlman pyeton ki ka pase barikad yo. Motosiklis k ap eseye fòse pase baraj yo resevwa kout wòch anba men pwotestatè ki an kòlè.
Se menm sitiyasyon sa kap dewoule nan plizyè vil pwovens. Nan Okay, Ti Gwav, Okap, mobilizasyon popilè ap grandi apre premye minis la te anonse ogmantasyon pri gaz la. Yon seri de mouvman tanmen toupatou nan peyi a pou di pouvwa an plas nouvèl monte pri gaz la pa byenvini.
