Samdi 6 janvye 2024 la, endividi ak zam ilegal nan Maryani atake kèk kannòt ki t ap asire transpò sou lanmè a nan zòn Vilaj Alpha, yon kote yo rele tou nan Tibòt. Daprè sa medya an liy VantBèf enfo rapòte, pou piti 7 moun pèdi lavi nan atak sa epi bandi yo pote ale plizyè lòt moun.
Bandi ak zam k ap opere nan katye Maryani ki nan Komin Gresye, pa sispann mete dlo nan je manm nan popilasyon an depi 1e novanm 2023. Zak endividi ak zam yo deja pouse do 507 fanmi pou 2 487 moun konsa. Anpil nan sitwayen yo pran refij nan komin Gresye ki nan premye seksyon Mòn Bato, daprè sa Òganizasyon Entènasyonal Migran (OIM) te rapòte sou dosye sa.
Sa pa anpeche anpil moun toujou tante travèse zòn sa ki relye Kafou ak Gresye. Anpil nan sitwayen sa yo pou evite wout kote machin pase Maryani a, pran lanmè pou yo. Malgre danje ki prezante sou lanmè a, moun yo prefere pran risk lanmè a pito.
Men bandi yo p ap opere atè sèlman. samdi 6 janvye a a, nèg ak zam yo anvayi lanmè a nan zòn Vilaj Alpha nan Tibòt. Yo ouvè kout bal sou ti bato yo. Zak briganday sa yo lakòz pou piti 7 ka lanmò pami yo yon sèten Fritzner Jean-Baptiste ki se youn nan Kapitèn ti kannòt yo, gen plizyè ‘’madan sara ‘’ bandi yo te sekestre nan zone labatwa nan mariani selon kek paran viktim.
