17 me 2024 la reprezantan ameriken Jan Schakowsky ak Ko-Prezidan gwoup travay sou Ayiti Sheila Cherfilus-McCormick ak Yvette Clarke pwopoze yon plan pou rekonstwi Ayiti. Pwopozisyon sa rele Plan Envestisman Louvètu, se yon pwogram devlopman 50 milya dola sou 10 ane.
Plan sa vize estabilize peyi a, ranfòse enstitisyon demokratik ak jidisyè yo, envesti nan enfrastrikti esansyèl, ogmante kwasans ekonomik epi kreye opòtinite pou fanm ak jèn yo.
Jan Schakowsky mete aksan sou reziyasyon li remake lakay pèp ayisyen an fas ak kriz la ki dire twòp. Ak rezolisyon sa a, reprezantan yo espere bay Ayiti mwayen pou kreye ak aplike yon plan pasifik ak pwospé pou lavni. Y ap travay kole kole ak anpil lidè ayisyen-ameriken, sa yo ki nan 9yèm Distri Kongrè a nan Illinois, pou rezolisyon sa ka pase.
Sheila Cherfilus-McCormick, sèl manm Kongrè a ki fèt nan peyi Dayiti, di enstabilite ak kriz imanitè k ap vale teren mennen nan grangou, vyolans ak povrete. Li mete aksan sou enpòtans sipò Etazini genyen pou Ayiti epi li pwomèt pou l ranfòse relasyon ant 2 peyi yo.
Pou rapèl plan envestisman Louvèti a, si li adopte, pral ede rekonstwi Ayiti. Rezolisyon sa a pral ankouraje tou efò ayisyen pou retabli estabilite nan peyi a.
