Komisè gouvènman Pòtoprens la, Me Edler Guillaume libere 82 prizonye soti lendi 8 desanm 2023 pou rive mèkredi 20 desanm 2023 nan prizon Sivil Pòtoprens la. Chèf pakè Pòtoprens la fè konnen yo pran inisyativ sa nan lide pou yo redui kantite moun ki nan detansyon prevantif pwolonje nan peyi a.
Daprè nimewo 1 pakè Pòtoprens la, moun sa yo te dèyè bawo pou kèk enfraksyon ki merite pèn koreksyonèl tankou: amand oubyen prizon pou yon ti kal tan. Genyen nan yo ki te vòlè telefòn , genyen ki te vòlè bèt genyen tou ki goumen ak moun. Komisè a deklare moun sa yo ta dwe pase ant yon lane ak twa lane nan prizon. Men pou pi piti yo gentan t ap kouri sou kat ou byen senk lane nan Penitansye nasyonal.
82 endividi sa yo pral rejwenn fanmi yo nan kad batay Pakè Pòtoprens di yo tanmen pou redui detansyon prevantif pwolonje a nan peyi a. Ansyen prizonye sa yo ki pral gen chans pase fèt fen lane a ak fanmi yo, te manifeste kontantman yo nan lakou Prizon Sivil Pòtoprens la epi yo te pwofite remèsye Komisè gouvènman Pòtoprens la.
” Batay kont detansyon prevantif pwolonje a p ap kanpe la. Nou pral pran yon poz pou n rebalanse madi 26 desanm k ap vini la“, n ap site deklarasyon chèf pakè Pòtoprens la ki pwomèt pou l vizite prizon fanm yo ak prizon ki nan komin Kafou yo tou.
Carl Henry Florant
