Daprè Òrganization Entènasyonal Migrasyon an (OIM), peyi vwazen Ayiti yo ki nan rejyon an voye tounen 13 000 migran Ayisyen k al chache refij lakay yo akoz sitiyasyon malouk Ayiti ap fè fas la. Daprè kominike OIM pibliye 4 avril 2024 la, se plis pase 46% kantite ayisyen yo te voye tounen lakay yo mwa fevriye pase a.
Malgre sitiyasyon Ayiti ap viv la, peyi vwazen nou yo kontinye ap pouse do ayisyen k al chache lavi lakay yo. OIM revele se plis pase 13 000 Ayisyen yo depòte. 3 000 ladan yo jwenn yon èd alimantè lè yo rive nan peyi a, 1 200 nan migran sa yo benefisye yon soutyen sikososyal.
Enstitisyon Nasyonzini an fè konnen dènye zak vyolans yo tabli dezespwa nèt pou popilasyon an ki pa wè lòt opòtinite pase devan je l se kite peyi a tout jan yo jwenn. Sistèm sante a ap plonje, lekòl fèmen nan kapital, gwo grangou k ap menase Ayiti a pouse anpil moun panse touye tèt yo.
Carl Henry Florant
