Prezidan Dominiken an, Luis Abinader, anonse dimanch 6 avril 2025 lan, yon seri mezi ki vize ranfòse batay kont imigran iregilye ki soti nan peyi Dayiti, li pran desizyon sa akoz klima sekirite a ki vin pi man nan peyi a, chèf leta konsidere sitiyasyon sa kòm yon gwo menas pou Repiblik Dominikèn.
Daprè Diario Libre, Luis Abinader deside pa rete ap gade kriz la k ap dejenere nan peyi dayiti , yon kriz sekirite, anviwonman ak ekonomik. Sepandan, li ensiste, pwoteksyon teritwa dominiken rete yon priyorite. Nan sans sa chèf leta pran 15 mezi enpòtan.
15 mezi yo:
1. Reyòganizasyon militè sou fwontyè a: twa brigad aktyèl yo pral divize an sis zòn operasyonèl, chak ap gen nan tèt yo yon ofisye siperyè.
2. Ranfòsman militè yo: 1,500 sòlda anplis pral deplwaye sou fwontyè a, anplis 9,500 ki deja mobilize yo.
3. Akselerasyon konstriksyon miray sou fwontyè a: yon apèl pou òf pral lanse imedyatman pou ajoute 13 km nan 54 km ki deja konstwi a.
4. Refòm lejislatif: Y ap prezante yon pwojè lwa refòm imigrasyon bay Kongrè a, ak penalite pi di pou konplis nan imigrasyon ilegal, kit pwopriyetè oswa ofisyèl.
5. Ogmantasyon efektif: 750 nouvo ajan pral entegre nan Direksyon Jeneral Imigrasyon.
6. Deplwaman nan pwovens yo: biwo kontwòl imigrasyon yo pral mete kanpe nan tout pwovens yo.
7. Kontwòl komès sou fwontyè a: pral gen ti pase men nan règ yo pou kenbe ouvèti ki nan komès la, pandan y ap limite imigrasyon iregilye.
8. Kreyasyon yon pakè espesyalize: pwopoze pou kreye yon pakè espesyalize nan ka migrasyon.
9. Mobilizasyon otorite lokal yo: Gouvènman minisipal yo pral patisipe nan efò rapatriman yo.
10. Kreyasyon yon obsèvatwa sitwayen: kò sa a pral kontwole aplikasyon politik migrasyon an epi li pral fòme pwopozisyon.
11. Nouvo egzijans nan lopital piblik yo: Apati 21 avril, pasyan yo pral bezwen montre idantifikasyon, prèv travay ak yon tès rezidans pou yo trete yo. Ak absans dokiman sa yo, pasyan yo pral imedyatman rapatriye apre tretman yo.
12. Revizyon regilarizasyon konplè: Doktè Milton Ray Guevara pral kowòdone yon komisyon pou revize lejislasyon migrasyon an nan limyè de kriz ayisyen an.
