Nan yon konferans pou laprès ki te òganize mèkredi 29 novanm nan, sekretè jeneral “SOS Journalistes” lan Guyler C. Delva denonse arestasyon depi yon lane jounalis Gerland Hyppolite epi mande jistis pou jounalis Garry Tess ki te asasinen 18 oktòb 2022.
“SOS Journalistes” lonje dwèt sou komisè gouvènman Okay la, Me Ronald Richemond ki kenbe nan prizon jounalis Guerdy Hyppolite, ki se zanmi defen Tess.
Guyler C. Delva denonse move tretman Hyppolite ap sibi, li deklare se Komisè Richemond ki kont liberasyon jounalis la malgre òdonans jij Robert Jardin te bay.
“Nou la pou denonse Mèt Ronald Richmond, yon vrè predatè libète ekspresyon, ki refize swiv lòd jij la nan ka Mesye Guerby Hyppolite, zanmi defen jounalis Tess,” se sa Guyler Delva deklare.
Guerdy Hyppolite te jwenn arestasyon l apre l te fin denonse asasina zanmi l ak posib konplisite otorite yo. Guyler C. Delva mande gouvènman an, sitou Minis Emelie P. Milcé, pou l aji pou jistis tabli nan dosye a.
Delva pwomèt pou pase nan yon lòt faz denonsyasyon nan jou k ap vini yo si pa gen okenn aksyon ki poze.
