Nan yon long papye ki pibliye samdi 11 jen an jounal Ameriken Washington Post mete aksan sou yon estrateji gang ame yo itilize an Ayiti pou vann tèt yo pouvwa yo epi devlope anpil lò estrateji: itilizasyon rezo sosyal yo. Ekspè yo mande pou mete fen nan deriv sa a.
Daprè Washington Post, Gang yo sèvi ak rezo ki pi popilè yo tankou WhatsApp, Instagram, Tik Tok, YouTube, Twitter, pou montre nouvo materyèl yo, entimide rival yo, teworize popilasyon an, menase ak pase nan rizib ofisye lapolis ak jounalis.
Plizyè nan platfòm nimerik sa yo kòmanse aji kont malfra yo, dapre Washington Post. Nan plizyè okazyon, kontni nèg zam sa yo pibliye rive siprime Gen kèk kont kap ankouraje vyolans tou yo te siprime tou. Jounal la fè konnen yon kont Tik Tok lidè gang Izo tap itilize te efase. Pou menm chèf gang sa Meta efase yon videyo kote li te menase touye 30 moun. Videyo a te poste sou Facebook ak Instagram.
Gang ak zam fann fwa fè anpil viktim an Ayiti dènye ane sa yo. Pou mwa me a sèlman, gen pou pi piti 200 ka kidnaping ki anrejistrz, sitou nan zòn Pòtoprens lan. Ant 24 avril ak 16 me 2022, pou pi piti 180 moun pèdi lavi yo nan atak ame nan Pòtoprens, daprè Nasyonzini.
