Nòt pou laprès
Vandredi 3 novanm 2023
Nòt sou zak maspinay polisye nan Pakè Pòtoprens fè sou militan politik Rebert Nocent (Dizay) anba lòd Komisè Gouvènman an
Noumenm òganizasyon ki siyen nòt sa ap dabò fè sonje pwovèb ayisyen sila a ki di: “chimen bouton se chimen maleng”, nan lide pou ede mete tout moun sou men yo epi raple obligasyon nou genyen pou nou vijilan.
Nan sans sa a nou tout dwe byen konprann ki kalte siyal gouvènman defakto PHTK Ariel Henry voye ban nou lè yon komisè gouvènman ki ta dwe defansè sosyete a, defansè chak sitwayen oze bay lòd pou maspinen yon sitwayen paske l ap denonse sa li estime ki pa kòrèk.
Komisè gouvènman an ak ekip li poze yon zak malveyans ak kriminèl trè grav ki mande pou nou tout leve kanpe nan lide pou ekzije Jistis epi anpeche lòt sitwayen kontinye viktim. Se pou rezon sa yo nou kondane ak tout fòs nou zak maspinay polisye malveyan nan lapolis la fè sou militan politik Rebert Nocent (Dizay) nan Pakè Pòtoprens lan anba lòd Komisè Gouvènman Pòtoprens lan Edler Guillaume nan moman Militan an tap pote solidarite li ak jounalis Banatte Daniel ki se jounalis radio regard, yon Radyo k ap sibi pèsekisyon politik nan moman an.
Nap raple pou gouvènman Ariel Henry a ak akolit li yo, atik 28 konstitisyon 87 amande a garanti libète lapawòl. Kidonk, Komisè gouvènman an pase konstitisyon peyi a anba pye li, lè li chwazi bay lòd pou maspinen militan politik la pou opinyon li.
Nou denonse zak sa a ki sanble tèt koupe ak zak Ti Bobo te konn poze nan tan makout yo. Nap rete solidè nan angajman nou pou nou Kontinye goumen pou yon Ayiti granmoun kote dwa tout moun respekte kòmsadwa epi mande tout konpatryòt leve kanpe kont tout apranti diktatè ki soti pou replonje peyi a nan fènwa diktati. Leve Kanpe kont zak maspinay sila a nan ekzije Jistis ak reparasyon pou tout viktim enjistis espesyalman Rebert Noncent (Dizay).
Ansanm òganizasyon ki siyen nòt pou laprès sa mande:
1) Pou òganizasyon dwa moun yo panche prese prese sou kesyon an (OPC, RNDDH, FJKL, BAI elatriye)
2) Pou tout militan ak òganizasyon k ap batay yo akonpaye Militan Rebert Nocent (Dizay) pou l pote plent kont asasen yo.
3) Revokasyon ak arestasyon Komisè Gouvènman an ak tout polisye ki enplike nan zak malonèt sa a.
Aba tout foli makout!
Aba diktati!
Viv libète lapawòl!
Oganizasyon ki siyen nòt sa:
– Pati Polilè Nasyonal (PPN) / Keny Bernadin
– KPSAM / Absolu D’Jhonson
– Konbit Oganizasyon Politik Sendikal ak Popilè yo / Josué MÉRILIEN
– Tèt Kole Ti Peyizan Ayisyen / Origène LOUIS
– Rezistans Pou Ayiti / Patrice CELESTIN
– Mouvman Leve Kanpe pou Yon Lòt Endepandans /Nicolson PIERRE (Bab)
– CEREH / Robinson ALCÉ
– KRI MILITAN ANGAJE Kafoufèy/ Fenel JOSEPH
ACCED / Labonté JEAN
Pou otantifikasyon
Josué MÉRILIEN
Patrice CELESTIN
D’Jhonson ABSOLU
