Alòske l fè pati moun ki nan lis pèsonalite kap sipòte gang an Ayiti, nan yon nòt ki pibliye jedi 19 oktòb la sou paj ofisyèl li sou rezo sosyal yo, Youri Latortue voye jete byen lwen akizasyon yo komite ekspè Nasyonzini an mete sou do l.
”Mwen li rapò Nasyonzini ki gen dat 15 oktòb 2023, ki akize m de yon pakèt dosye dwòl mwen voye yo jete kareman paske yo pa reflete laverite.” se sa nou ka li nan kòmansman kominike a.
Ansyen senatè Latibonit lan fè konnen komite ekspè Nasyonzini an baze l sou sa advèsè politik li yo di pou l pwodui rapò sa sou dol. ”Se yon desepsyon pou mwen pou m konstate ke nan rapò li a, Komite Ekspè yo pran rimè advèsè m yo e menm bandi yo; san yo pa chèche rankontre m ak san yo pa te pran an kont rapò antikoripsyon m te konn pwodui sou ènmi sa yo,” toujou dapè Youri Latortue.
Nan sa ki gen pou wè ak finansman gang ”Kokorat san Ras,” ansyen palmantè a di li se premye moun ki te ekri lapolis pou konbat gang nan depatman Latibonit. Li di li pa konn ni an pent ni an penti okenn manm ki fè pati gang sa, li di tou li pa janm pale ak okenn endividi nan gwoup ak zam sa.
Toujou nan nòt la, Youri Latortue fè konnen li pa konn gen okenn rapò ak Jimmy Cherizier (Barbecue), li demanti enfòmasyon ki fè kwè li te bay Barbecue 30 000 dola vèt. Sou akizasyon ki peze sou do l paske l ta sipòte gang nan Raboto, ansyen prezidan Sena di Raboto se lakay li, li pat janm bay zam nan zòn sa. Li di tou si Raboto te gen zam jan yo fè kwèl la li tap gentan tounen yon zòn wouj. ”Raboto pa pratike kidnapin; Anplis, se Raboto nan Gonayiv tout aktivite komèsyal vil la ye : bank, restoran ak lòt ankò.” daprè Youri Latortue.
Nan kominike a, ansyen senatè a mansyone li pat mete okenn manm gang nan sekiritel, se te toujou polisye oubyen ajan sekirite ki gen sètifika DCPJ ki konn asire sekirite l.
Poul fini, Youri Latortue di li diponib pou l pote klarifikasyon sou akizasyon komite ekspè Nasyonzini an. Li anonse li pral mande avoka l pou ekri komite ekspè a pou fè limyè blayi. Nap raple Youri Latortue, ansyen prezidan Joseph Michel Martelly, Victor Profane, Reynold Deeb, Romel Bell se kèk pami pèsonalite ki gen non yo site nan rapò ONU kòm moun kap naje nan koripsyon epi kap sipòte gang. Sila yo ki site nan rapò sa pap ka vwayaje nan okenn peyi ki anndan nasyon zini ,yap sezi byen yo, bloke kont yo.
