Kanpe Machin vyòl la, se tit yon powèm trajik pwofesè Valéry Garçon mete deyò pandan peryòd difisil peyi Dayiti ap konnen la. Tèks sa dekri lapèn ak chagren chak grenn Ayisyen nan tout sektè nan lavi nasyonal la, kote politisyen san fwa ni lwa lage peyi a nan katchouboumbe. Elèv lekòl, etidyan, pwofesè, doktè, enfimyè, enjenyè, bòs mason, jounalis, ouvriye, biznismann, ti machann, madan sara, peyizan, atizan… Yo vyole rèv nou tout.
Kanpe Machin Vyòl la
Yo vyole rèv mwen
Yo vyole vizyon m
Yo vyole pwojè m
Yo vyole menm sistèm edikatif mwen
Yo vyole kay mwen
Yo vyole bous mwen
Yo vyole kanè bank mwen
Yo vyole salè minimòm mwen
Yo vyole kanè eskolè m
Yo volè kanè leson m
Yo touye j’aime Haiti m
Yo asasisen “Hygienne et morale” mwen
Yo vyole libète m
Yo vyole somèy mwen
Yo koupe dòmi nan je m
Yo vyole asyèt aleken m ak fòkse li
Yo vyole gode dlo sikre ak pen m
Yo vyole Fakilte Lengwistik
Yo vyole Lekòl Nòmal Siperyè
Yo vyole ENARTS
Yo fout vyole ata menm bibliyotèk nasyonal
Yo demantibile ane lekòl mwen
Yo mitonnen jounen blag mwen
Kisa nou rete poun fout vyole ankò?
