Antrenè ekip FC Barcelone nan, Xavi Hernandez, ki te anonse fen janvye l ap kite ekip la nan fen sezon an chanje lide. Nan yon konferans pou laprès maten jedi 25 avril la prezidan Barca ak ansyen mitan teren an anonse nouvèl la ofisyèlman.
Xavi ap rete antrenè Barca pou sezon kap vini la. Plizyè jounal nan peyi Espay te anonse nouvèl la kèk èdtan avan sa, jedi 25 avril la konsène yo anonse nouvèl la ofisyèlman. “Xavi gen anpil anbisyon. Nou sèten sa a se pi bon nouvèl posib pou klèb nou an. Estabilite se youn nan bagay ki pi enpòtan pou mennen yon pwojè avèk siksè. Li enpòtan anpil,” se sa Joan Laporta te deklare.
Alòske l te detèmine pou fè valiz li, Xavi deside fè bak. “Mwen santi konfyans prezidan an, direksyon an ak jwè yo,” se sa li te eksplike “pwojè sa a poko fini. Tout moun konnen atachman mwen ak klèb sa a dwe kontinye, fòk nou kontinye travay di, se pou sa mwen chanje lide.”
Nap raple pou sezon 2023-2024 la, Xavi ak ekip Barcelone nan elimine nan Koup di Wa, PSG mete yo deyò nan kadefinal Lig Chanpyon an, nan Liga ekip Real Madrid lan devan yo ak 11 pwen diferans. Xavi ak FC Barcelone sou wout pou yon sezon blanch.
