Nan yon nòt senpati ki parèt samdi 25 me 2024 la, konsèy prezidansyèl tranzisyon an ki gen nan tèt li Edgard Leblanc Fils kondane ak tout fòs li zak asasinay ki fèt sou popilasyon ak sou 2 misyonè ameriken ak yon Ayisyen dènye jou sa yo nan zòn metwopolitèn Pòtoprens lan.
“Konsèy Prezidansyèl Tranzisyon an kondane zak bandi ak zam yo ki vize popilasyon an nan plizyè rejyon nan peyi a sitou nan zòn metwopolitèn Pòtoprens lan. KPT a pwofite okazyon sa a pou l eksprime tout endinyasyon li apre asasina twa (3) jèn pami yo yon ayisyen ak de Ameriken jedi 23 me 2024 la nan Lizon, komin Kwadèboukè.” se sa KPT a ekri nan kòmansman nòt la.
Konsèy prezidansyèl la pwofite tou pou l bese byen ba devan kadav viktim yo epi prezante kondoleyans li bay fanmi yo, gouvènman an ak pèp Ameriken an. KPT a fè konnen tou Direksyon Jeneral Polis Nasyonal Dayiti deja bay lòd pou lanse yon ankèt pou yo ka idantifye bandi yo, arete yo epi mennen yo devan lajistis konsa pou yo ka pini yo daprè lalwa.
Yon lòt kote, konsèy prezidansyèl tranzisyon an pwofite okazyon sa a pou l renouvle detèminasyon li pou l fè tout sa ki posib, ak sipò kominote entènasyonal la, pou netralize gang ak zam yo, yon fason pou retabli lòd piblik ak lapè nan tout peyi a.
