Apre asasina de misyonè Ameriken, Davy Lloyd ak Natalie Lloyd, ansanm ak yon sitwayen ayisyen, Jude Montis, 23 me 2024 la, nan yon kominike pou laprès ki te pibliye 25 me a sou paj ofisyèl Facebook li a, OPC drese yon tablo nwa sou sitiyasyon ensekirite a, sitou nan zòn metwopolitèn Pòtoprens la. Biwo Pwoteksyon Sitwayen (OPC) mande chanjman nan wo kòmandman Polis Nasyonal Dayiti (PNH) a epi mande pou mete sou pye yon Konsèy Sekirite Nasyonal (CNS).
OPC soulinye depi enstalasyon Konsèy prezidansyèl la 25 avril 2024 pase a, aksyon kriminèl yo kontinye ap entansifye, asasina, kidnapin, vyòl, destriksyon batiman piblik yo se kèk pami zak malonèt endividi yo ap poze chak jou ki jou. Kominike pou laprès OPC a presize bandi nan kowalisyon “VIV ANSANM” vandalize epi boule plis pase 30 komisarya ak sou komisarya.
Biwo a mande chanjman nan Wo kòmandman PNH la. Anplis de sa, OPC envite Konsèy prezidansyèl la pou evalye sitiyasyon sekirite a nan peyi a epi pou l jwe wòl li nan retabli sekirite sou tout teritwa nasyonal la, sitou atravè Misyon Sipò Miltinasyonal pou Sekirite (MMSS) epi nan mete sou pye CNS la.
