Dimanch 9 jen 2024 la, 3 polisye Inite tanporè anti-gang mouri apre blennde yo te ladann lan pran nan yon anbiskad nan Dèlma 24. Depi aprè evenman trajik sa tout kouch nan sosyete ayisyèn nan reyaji, se ka Fondasyon je klere nan yon kominike ki parèt lendi sa ki di li choke epi mande arestasyon koupab yo prese prese.
«Fondasyon Je Klere (FJKL) aprann asasina chokan ak revòltan Fermetus Emelin (30yèm), Piton Wilkens Jean jinyò (31yèm) ak Clovis Peterson (32yèm), twa ajan lapolis ki soti nan
Inite Tanporè Anti-Gang (UTAG) nan Dèlma 24 dimanch 9 jen 2024 la.» se sa nou te ka li nan kòmansman nòt la
Pi devan FJKL fè konnen yon fwa ankò, polisye yo pran nan yon anbiskad bandi yo. Òganizasyon dwa moun nan ale pi lwen pou di krim sa a se rezilta koripsyon k ap taye banda nan administrasyon enstitisyon ki responsab sekirite nasyonal la. «Krim sa a te kapab evite si lajan ki rezève pou sèvis entèlijans yo te byen depanse», Pawòl responsab FJKL yo.
Nan kominike sa Fondasyon je klere mande pou yo arete san pèdi tan responsab krim sa a koalisyon gang Viv Ansanm nan reklame a. FJKL kwè tou Frantz Elbé pap regle anyen serye nan tèt PNH la, òganizasyon an mande revokasyon l prese prese.
Yon lòt bò, Fondasyon je klere te pwofite okazyoan an pou l voye senpati l bay fanmi polisye sa yo ki tonbe pandan y ap sèvi peyi yo. «San sèvitè Leta sa yo koule pou raple nesesite pou retabli lòd piblik ak trankilite nan lari yo sou tout teritwa nasyonal la. Li lè pou nou mete fen nan mascarad zòn san lalwa, teritwa pèdi, bandi k ap defye lòd repibliken», deklarasyon FJKL
