Polis Nasyonal Dayiti an dèy. Polisye Rémy Cynce 22yèm pwomosyon ajan 3 (SDPJ), tonbe anba bal nèg ak zam nan aprè midi lendi 19 fevriye a nan vil Okap, zòn “Petite-Anse”, se Sendika Nasyonal Polisye Ayisyen yo ki konfime nouvèl la.
Daprè SYNAPOHA zak sa pase nan moman polisye a te nan machin li, madanm ak pitit li yo tap rantre lakay lè malfra yo louvri kout zam sou li, selon enfòmasyon SYNAPOHA rive jwenn se labank polisye a te sòti.
Pi lwen youn nan responsab SYNAPOHA, Lionel Lazarre, fè konnen gen youn nan bandi yo ki tonbe nan kad echanj kout zam ak polisye a. Responsab la fè konnen li pa konfime si madanm polisye a blese nan atak sa.
Nap raple, Hector Roobens yon ajan 1 Polis Nasyonal Dayiti te tonbe anba bal bandi blòk estad Sylvio Cator mèkredi 14 fevriye pase a. Asasinay Rémy Cynce lonje lis polisye ki te deja tonbe anba bal nèg ak zam pou 2 premye mwa nan ane 2024 la.
