Atis ayisyen Roody Pétuel Dauphin nou tout konnen sou non Roody Roodboy mete deyò dènye Album li ki gen pou tit ”Tou 9”. Sou Album sa nou jwenn 16 mizik pami yo atis la gen 9 kolaborasyon ak lòt atis nan sektè mizikal la tandiske lòt 7 tit yo Roody Roodboy chante yo an solo.
9 mizik ki an kolaborasyon sou plak sa se : ”Babylòn” ki twouve l nan premye pozisyon sou plak la li fèt an kolaborasyon avèk Bel’O ; nou jwenn an twazyèm pozisyon ”An silans” Tjo Zenny mete vwa l sou mizik sa ; genyen tou Kokoye ki okipe sizyèm plas sou album sa, genyen plizyè atis ki mete vwa sou mizik sa pami yo nou jwenn Andy Beatz, Toby, Costy Jay, Paska ak Jea Fox ; ”Men manmi tololo” se yon kolaborasyon avèk Jules Borde ; nou jwenn an nevyèm pozisyon sou album nan ”Konplis” kote rapè Fantom kolabore ak chanpyon kanaval 2018 lan ; ”Libète ou lanmò” se yon kolaborasyon ak Freedom; ”Fwontyè featuring D’Yne epi dènye kolaborasyon an fèt ak Mechans T li gen pou tit ”Ti Jwèt”.
Sorry to my ex; Madanm ak pitit ; Manman ; Anbago ; Grenn ; Dous pou dous epi Ou pa merite sa, se 7 lòt mizik nou jwenn sou plak ”Tou 9” ki soti samdi 19 dawout pase a. Album sa se yon album kote nou jwenn plizyè jan mizikal tankou konpa, afro , rap, rege. Apre premye album ki te rele “Fòk tèt ou la” ”Tou 9” se dezyèm album Roody Roodboy nan karyè l, sèlman kèk jou apre album sa soti fanatik Roody yo anvayi platfòm yo pou koute bèl tèsk ak bèl vokal ki gen nan mizik yo.
