Konsèy nasyonal sosyete sivil ayisyen gen gwo tèt chaje fason kriz ant ayiti ak repiblik domiken a ap anpire chak jou Bondye mete.
Anviwon yon mwa depi fwontyè fèmen okenn pwodwi paka travèse sou zile a ki malerezman kondane pou viv Ansanm. Koze sa se vre gen plis enpak sou Repiblik Domiken kap pèdi 3 milyon dola chak jou daprè ekonomis Enomy Germain, men femen fwontyè a pap san enpak tou sou peyi Dayiti ki gen abitid achte pwodwi alimantè lakay vwazen.
Ayiti yon peyi agrikòl nan bouch men nou pat pare pou viv moman sa britsoukou, annatandan otorite yo lanse pwodiksyon agrikòl la Konsèy Nasyonal Sosyete Sivil Ayisyen an fè plizyè pwopozisyon pou konble vid kriz la kreye a tankou louvri pò Fort Liberté kap pèmèt nou fè echanj komèsyal ak Miami ak lòt peyi nan rejyon an epi bay otorizasyon pou louvri pò St. Louis du sid la kap bay posiblite pou kolabore ak jamaïque Cuba elatriye.
Nan sans sa kriz sa nap transfòmel an opotinite nan louvri peyi a bay lòt peyi ki petèt pi pwofitab pou Ayiti daprè prezidan konsèy sosyete sivil la Joseph Domingue Orgella.Yon lòt kote Orgella kwè leta Ayisyen ka pote plent kont prezidan Luis Abinader ki deside mete ponp nan tèt kote nap konstwi kanal Ayiti pou rale dlo rivyè masak, yon fason poul kapab redwi debi dlo a. Anviwonman yon mwa depi fwontyè fèmen sou zile a, yon sitiyasyon ki gen enpak sou 2 peyi yo, nan peyi Repiblik Domikèn ze ap pouri nan fèm, pa bò lakay nou pri ze a monte piwo nan Yon peyi kote grangou lamizè te deja ap vale teren.
