KONEKTE HAÏTI konstate avèk anpil tristès, sityasyon malouk ke lapli vandredi 2 jen ak jounen lapli 3 jen 2023 a mete popilasyon ayisyèn nan ki te deja nan gwo pwoblèm.
Se avèk anpil soufrans ak dlo nan je, ekip KONEKTE HAÏTI a t’ap gade kòman lapli sila yo te san pitye pou Ayisyen, nan jan li tap pote ale vi ak tout kalte byen nan yon seri vil nan peyi a, tankou : nan Jeremi ak tout rès depatman grandans lan, nan Leyogan, nan Gresye, nan komin Fon Vèrèt, nan zòn metwopolitèn Pòtoprens lan ak zòn ki antoure li yo tankou :
Kafou aviyasyon, Site solèy, Fouji, Kwadèmisyon, Taba ak kwadèboukè; sann pa bliye anpil depatman nan peyi a ki anba dlo.
Yon sityasyon ki te pouse manman, papa ak pitit te oblije ap chèche abri sou kèk do kay tankou poul kap jouke pye bwa lè lanjelis tonbe.
Yon sityasyon ki lye ak move konpòtman responsab nan leta yo te toujou genyen zafè enfrastrikti ak anviwònman.
Nan sans sa, KONEKTE HAÏTI ki toujou kanpe bò kote viktim yo, sitou sila ki nan mas defavorize a, ap mande ak gouvènman PM Ariel HENRY a pou li dekrete “eta ijans enfrastriktirèl ak anviwònmantal”epi monte yon TASK FORCE ak tout enstitisyon konsène tankou: ministè travo piblik, ministè anviwònman, SNGRS, CNE, elatriye.
Kote yap gen 2 pi gwo misyon sila yo:
1) pote èd bay viktim ki pa gen kote pou yo dòmi aprè yo fin pèdi prèske tout sa yo te posede.
2) mete sou pye yon program asenisman k’ap akonpanye ak gwo flòt materyèl pou netwayel twou rego yo, kanal yo ak tout sa ki la pou pèmèt dlo koule byen pou anpeche pèp la twouvel nan difikilte sa yo chak lè lapli tonbe. Paske sezon siklonik lan deja kòmanse, si pa genyen anyen ki fèt pita ka pi tris.
Pou nou fini, KONEKTE HAÏTI ap voye senpatil bay tout fanmi ki viktim yo epi fè yo konnen ke yo pa pou kont yo. Paske KONEKTE HAÏTI te avèk yo, li avèk yo e l’ap toujou avèk yo.
Viv yon Ayiti ki konekte ak tout sa ki ka mennen li sou wout devlopman.
Viv KONEKTE HAÏTI !
