Estrikti “Nou Pap Konplis” pibliye yon nòt pou laprès ki bat bravo pou enstalasyon nouvo Konsèy Prezidansyèl la an Ayiti. Estrikti sa a raple enpòtans pou manm Konsèy la poze aksyon yo gen nan plan yo pandan 24 mwa k ap vini yo, an akò ak atik 10 dekrè ki kreye Konsèy la.
Nou Pap Konplis espere Konsèy la pral pran tout dispozisyon ki nesesè pou retabli lòd ak sekirite nan peyi a, yon fason pou pote lapè ak trankilite nan popilasyon ayisyèn nan.
Malgre enkyetid yo te eksprime sou mekanis Konsèy la depi nan fòmasyon li, òganizasyon an rekonèt manm aktyèl yo gen responsablite pou dirije peyi a. “Nou Pap Konplis” mande manm Konsèy la pou yo pa minimize defi k ap tann yo, epi mete aksan sou sitiyasyon difisil la nan peyi a, tankou vyolans, ensekirite alimantè ak kondisyon sanitè a.
“Jounen jodi a nou gen yon peyi devaste, 80 pou san kapital la anba men bandi ,160 mil moun kite lakay yo nan kapital la mwatye ladan yo se se timoun selon UNICEF ,70 pou san kad kouri kite peyi a akoz sitiyasyon sa”. Nou tap site nou pap konplis ki tap dekri sitiyasyon tèt chaje peyi a twouvel depi kèk tan.
Kòm youn nan oganizasyon kap batay kont koripsyon nan peyi a, NPK ankouraje manb konsèy yo pou al fè deklarasyon patrimwan yo nan ULCC pou voye yon sinyal bay sosyete a.
Li mande tou tèt ansanm ak inite nan mitan manm Konsèy yo pou voye yon mesaj solidarite nasyonal bay pèp ayisyen an. Nou Pap Konplis mande pou eleksyon Prezidan Konsèy la òganize pi vit, pou pèmèt tou fòmasyon yon nouvo gouvènman “tout moun ladann “.
