Seleksyon nasyonal maskilen senyò a konnen ak ki ekip li pral twoke kòn li pou l espre jwenn biyè Kalifikasyon l pou 2yèm tou eliminatwa mondyal 2026 la. Grenadye yo nan gwoup C a, ap gen pou afwonte Kiraso, Sent Lisi, Babad ak Awouba daprè kalandriye Konfederasyon Amerik Nò, Santral ak Karayib la (Concacaf) kominike Federasyon peyi konsène yo vandredi 5 avril 2024 la.
Se pral nan mwa jen 2024 k ap la Ayiti pral antre nan batay la. 5 jen 2024, ekip gason ayisyen an ki nan gwoup C a, ap resevwa seleksyon gason peyi Sent Lisi a bò 8è nan aswè konsa avan Grenadye yo deplase pou al jwe kont Babad lakay li samdi 8 jen 2024 toujou bò 8è nan aswè. Aprè yon bon peryòd kanpe, seleksyon nasyonal maskilen an ap retounen nan kanpay eliminatwa kont Awouba 5 jen 2025 avan l resevwa Kiraso 9 jen.
Se pral sou direksyon nouvo seleksyonè a, Sébastien Mignon, jwè ayisyen yo pral goumen pou mennen peyi a nan yon lòt Koupdimond aprè 52 lane yo te patisipe an 1974 la. Ayiti dwe depi nan premye match la montre l vin chache yon Kalifikasyon, sitou se li k ap resevwa si match la pa ta fèt nan peyi a.
Pou Ayiti kalifye pou dènye faz la, fòk li fini pami 2 premye pou l li a. Aprè sa, 12 ekip ki ap rete yo, yo pral repati nan 3 gwoup k ap genyen 4 ekip ladan yo. Chak ekip ap jwe 6 match : ale epi retou. 3 premye seleksyon yo ap tou kalifye pou mondyal la epi 2 meyè 2yèm yo pral jwe baraj. Li bon pou raple peyi tankou Etazini Meksik ak Kanada kalifye dirèk paske se yo kap òganize mondyal 2026 la soti 11 jen pou rive 19 jiyè 2026.
Carl Henry Florant
