Enstans ki responsab foutbòl mondyal la, FIFA konfime jedi 8 jen an, kantite lajan lap gen poul bay nan mondyal la ap yon afè 152 milyon dola ameriken; ki vle di 3 fwa plis pa rapò ak mondyal 2019 la peyi Lafrans te òganize, 10 fwa plis ke mondyal 2015 la kite fèt nan peyi Kanada.
Chak seleksyon kap elimine nan premye tou: chak grenn foutbolèz ap benefisye 30 mil dola Ameriken. Seleksyon kap gen pou kanpe nan 8tyèm de final yo, chak grenn foutbolez pral touche 60 mil dola. Si ekip la rive nan kadefinal, yon chèk 90 mil dola ameriken pou chak atlèt.
Rive nan dènye kare a, pou demifinal sèlman, 165 mil dola ap rantre nan poch chak jwez kap pèdi ti final. Seleksyon kap gen pou resevwa meday bwonz la, chak jwez yo pral jwenn 180 mil dola.
Nan final la, ekip kap pèdi a, chak grenn foutbolez ap jwenn 195 mil dola plus meday ajan. Kanta pou seleksyon ki pral chanpyon an, chak jwez pral touche 270 mil dola ameriken.
Nap siyale chak seleksyon dwe genyen 50 moun nan delegasyon yo. 736 foutbolèz, 23 nan chak seleksyon pral jwe mondyal la kap gen pou fèt nan 2 peyi Ostrali ak nouvèl-Zélande (kontinan Oseyani) soti 20 jiyè pou rive 20 Dawout.
Jonathan Charles
