Milye teren fransè ekip Juventus la, Paul Pogba tonbe anba sanksyon Lajistis peyi Itali poutèt li te teste pozitif nan testotewon aprè match Udinese-Juventus ki te fèt 11 septanm 2023. Aprè yon bann tan, desizyon Tribinal anti dopaj peyi Litali a soti jodi jedi 29 fevriye 2024 la. Pogba pral pase 4 lane san l pa jwe foutbòl ofisyèlman.
Ansyen jwè Manchester United la daprè Tribinal la vyole atik 2.1 ak 2.2 Codice Sportovo Antidoping di NADO Italia (CSA). Aprè premye tès yo, klèb Italyen an te ekate jwè a menm pou l pa t antrene ak rès ekip la. Li te sanksyone pwovizwaman. Pogba te genyen 7 jou pou l te pwouve inonsans li nan dosye sa.
Milye teren fransè a ki te rive jwe sèlman yon sankantèn minit pou Turinwa yo sezon pase a poutèt blesi p ap kapab monte teren foutbòl avan 4 lane sa yo pase. Se desizyon sa Tribinal anti dopaj peyi Itali a kominike jodi a sou dosye sa. Vyèy dam nan kapab koupe kontra chanpyon Koupdimond 2018 la ki te dwe bout nan ete 2026.
Se yon gwo kou pou jwè a ki pral gen 31 lane a, ki p ap ka retounen sou teren avanl gen 35 lane. Eske desizyon sa pral fè l mete fen nan karyè l ?
N ap soulinye, sispansyon sa ka fè objè apèl daprè enfòmasyon yo.
Carl Henry Florant
