Blòk majorite Akò 21 desanm nan eksprime prewokipasyon yo fas ak kriz la k ap vin pi di chak jou. Nan sans sa yo pibliye yon kominike pou Laprès madi 2 avril 2024 la pou eksprime enkyetid yo fas ak kriz la epi mande manm Konsèy Prezidansyèl la pou yo aji pi vit nan lide pou akselere pwosesis enstalasyon an.
Gwoup majorite Siyatè Konsansis Nasyonal pou yon Tranzisyon Enklizif ak Eleksyon Transparant yo rele pi souvan Akò 21 desanm nan pa kache prewokipasyon l fas ak menas k ap peze pi lou sou do popilasyon Ayisyen an ki pa konn ki sen pou li rele.
Pou gwoup majorite a pèp ayisyen an pa kapab ankò. Se pa moman pou nèg ap rale ti pwent dra pou voye sou yo. “Se pito moman pou n montre linite ki gen nan mitan nou.”
Se poutèt sa n ap site, malgre nou gen anpil rezèv sou moun ki fè pati KP a, menm si nan Akò a nou pa gen menm vizyon ak rès aktè yo, men nou temanye bon lafwa nou nan voye reprezantan nou nan Konsèy la ki se Doktè Louis Gérald Gilles. Manm Akò 21 desanm yo rete kwè menm jan yo se plizyè pati ki mete tèt yo ansanm pou yo bay yon sèl moun epi kanpe dèyè grenn moun sa, pou fasilite pwosesis la, rès aktè ki konpoze KP a ta dwe suiv menm wout sa a.
Nap raple lòt gwoup akò 21 desanm nan ki gen André Michel, Marjory Michel, Edmonde Bauzile elatriye ekri Caricom, yo rete kwè lap difisil pou CP a ateri parapò ak anpil kontestasyon ki deja genyen kont solisyon sa nan peyi a. Yo pwopoze pito pou yon jij nan lakou Kasasyon ta pran pouvwa.
Carl Henry Florant
