Marie Gislhaine Monpremier ki te reprezante plizyè platfòm politik nan konsèy prezidansyèl CARICOM nan tankou Platfòm politik Rezistans Demokratik, Konpwomi Istorik, salye nouvo chwa platfòm sa yo ki nonmen Madam Dominique Dupuy, reprezantan Ayiti nan UNESCO a, kòm nouvo reprezantan yo nan konsèy la. Madam Monpremier remèsye ekip ki te chwazi l la epi pote soutyen l bay Madam Dupuy daprè jounal le Nouvelliste.
Marie Ghislaine fè konnen nan yon nòt, se paske yo te fè l konfyans ki fè yo te chwazi l pou l al defann yo nan konsèy sa k ap gen pou ranplase ekip Ariel la nan tèt peyi a. Poutèt sa li salye epi remèsye Òganizasyon fanm yo, Òganizasyon lajenès ak moun Gran nò ki te byen akeyi chwa sa a. «Mèsi pou konfyans nou ak sipò nou», se konsa l remèsye chak moun nan yon sans oubyen yon lòt kite pote l konkou.
Yon lòt kote, li fè konnen se li menm ki deside pase flanbo a bay Anbasadè Ayiti nan UNESCO a, Madam Dominique Dupuy ki sòti nan Nò menm jan ak li. Pou li menm, Madam Dupuy se yon jèn ki gen kapasite pou l ede peyi a sòti nan kafou lanmò sa l chita kò l la. Li kapab n ap site, «ede n redrese bak peyi a sou plan sekirite, ede fè referandòm la epi li ka ede n nan òganizasyon eleksyon yo».
Nan sans sa, li mande tout ayisyen pou pote sipò yo bay nouvo chwa sa platfòm li ta pral reprezante yo fè nan dènye lè a. Madame Monpremier egzòte tout pèp ayisyen an tou, pou yo met men pou ede Ayiti soti nan kriz san parèy l ap konnen an.
Carl Henry Florant
