Pandan nou te kwè nan yon kalifikasyon istorik Grenadyè yo pou koup di mond 2023 a, sitou apre viktwa kont Meksikèn yo, seleksyon ayisyèn senior fanm nan pèdi kont Jamayik (4-0) lendi 11 jiyè a nan peyi Meksik nan kalifikasyon pou koup di mond zòn konkakaf la. Khadija Shaw, kapitèn Jamayikèn nan sakrifye ekip Ayiti a lèl fè 2 gòl nan match sa.
Ayiti te bezwen yon match nil sèlman kont Jamayik pou l te kalifye pou pwochen koup di mond ki pral jwe an Oseyani a, patenè Dumornay yo ak defèt anmè sa pral pase nan baraj pou eseye rache yon tikè kalifikatif pou koup di mond senior fanm yo.
Malmennen pa Reggae Girls yo, Ayiti rate kalifikasyon dirèk li pou koup di mond fanm yo, fòmasyon ayisyèn nan fini twazyèm nan gwoup li a avèk 3 pwen dèyè Jamayik, Ayiti dwe jwe baraj entèkontinantal pou l rache tikè l pou Oseyani. Baraj yo ap dewoule nan peyi Nouvèl Zeland, soti 18 pou rive 23 fevriye 2023. Pral genyen 10 ekip nan baraj sa yo (2 ekip ki soti nan Azi, 2 ekip ki soti nan Lafrik, 2 ekip ki soti nan CONCACAF, 2 ekip ki soti nan AmSud, 1 ekip Oseyan, 1 ekip Ewòp), FIFA ap mete 10 ekip sa yo an 2 gwoup 3 ak yon gwoup 4. Pral genyen sèlman twa (3) plas disponib pou barajis yo, gayan chak gwoup ap pran yon tikè pou ale nan nevyèm edisyon koup di mond fanm ki pral dewoule an Ostrali ak Nouvèl Zeland soti 20 jiyè pou rive 20 out 2023.
