Lopital inivèsite Leta ayisyen yo rele pi souvan Lopital Jeneral la pou Kounye a anba men bandi ak zam yo. Ayè lendi 1e avril 2024 la, bandi yo te itilize espas la pou yo kache pandan yo t ap afwonte ak ajan Lapolis nasyonal yo daprè enfòmasyon kèk sous konfime pou redaksyon an.
Pi gwo lopital peyi a, lopital inivèsite Leta ayisyen an, pa ka founi swen ankò ak popilasyon ayisyen an. Lopital Jeneral tonbe anba men bandi ak zam yo ki konvèti espas la tankou yon espas konba pou twoke kòn ak fòs lòd yo. Enfòmasyon yo fè kwè endividi yo ta vandalize espas la menm moman.
Semèn nan kòmanse anba gwo tansyon nan zòn metwopmolitèn Pòtoprens la. Bandi yo pa sispann atake palè nasyonal la sou channmas menm jan ak plizyè zòn ki tou prè kapital la. Sekirite palè nasyonal yo kontinye ap defann espas la jan yo ta dwe fè l daprè yon sous polisyè san l pa presize pou konbyen tan y ap kapab estope seri atak sa yo. Menm moman, ajan PNH yo tou kontinye ap tante repouse atak nan kat kwen Pòtoprens.
Carl Henry Florant
