Final Sipè koup Espay la ofri nou premye klasiko pou lane 2024 la. Match sa ap fèt nan estad Al -Awwal Stadium an Arabie Saoudite, bò 2è nan aprè midi. De (2) gwo ekip Espanyòl yo : Real Madrid FC ak FC Barcelone, ki soti sou bèl prestasyon nan demi final yo montre yo motive pou yo tounen lakay yo ak twofe a.
Match sa pral fè 9è fwa Real Madrid kwaze ak Barcelone nan final Sipè koup Espay. Nan 8 final nan koup sa yo jwe deja, Madrilèn yo bat Baselonè yo sis (6) fwa deja. Yo te bat Basa nan lane 1988, 1990, 1993, 1997, 2012, 2017. Basa li menm genyen de (2) final sèlman. Ekip Xavi ap dirije a genyen final 2017 la epi final 2023 a. Men lè w rasanble tout konpetisyon ansanm Barcelone jwe 16 fwa nan final kont Real Madrid. Madrilèn yo genyen 10 final. Baselonè yo ranpòte 6.
Gen plizyè jwè ki p ap prezan pou match sa k ap jwe sou kontinan Azyatik la poutèt blese yo blese. Moun ki p ap ka prezan bò kote Real Madrid : Thibaut Courtois, Éder Militão, Lucas Vazquez, David Alaba. Bò kote Barcelone, Marcos Alonso, Iñigo Martinez, Marc-André ter Stegen, Raphael Dias Belloli, yo rele Raphinha,
Pablo Martín Páez Gavira, yo rele Gavi a. Kèk jwè yo gen dout sou yo pou yo ta jwe final la tankou pou Barcelone Jao Cancelo ki blese nan jenou. Dani Carvajar ki pa antrene ak ekip la men nan sal espò. Dout pou l jwe demen an pa gwo daprè enfòmasyon estaf medikal yo fe komnen. Estaf la rete kwè l ap prezan demen pou final la.
N ap raple se pral twazyèm final Sipè koup Espay Real jwe youn dèyè lòt. Li ranpòte 12 Sipè koup Espay. Barcelone li menm ki se ekip ki pran konpetisyon sa plis fwa ranpòte l 14 fwa. Ekip ki chanpyon an ap kite Arabie Saoudite ak yon anvlòp 7,5 milyon ewo.
Carl Henry Florant
